Суоттуга акция кэнсиэр

Бу олорор олохпутугар, ким даҕаны олох араас өрүттэриттэн бигэ көмүскэллээх буолбат. Араас мэһэйдэр, быһылааннар эйиигиттэн ыйыппакка эн олоххор баар буолаллар.
Биир оннук түгэн, биһиги биир идэлээхпит, кырылас кумахтаах Бүлүү сиригэр төрөөн, улаатан, үөрэнэн, Дьокуускайдааҕы культурнай-сырдатар училищены бүтэрэн үлэһит буолан, суугунас солко оттоох Суотту сиригэр кийиит буолан кэлэн олохсуйбут Валентина Сергеевна Бубякина дьиэ кэргэнигэр, умайар уот буолан киирэн, олорор олохторун аймаабыта, дьиэ кэргэн уйа туттан олорбут дьиэлэрэ-уоттара, таҥастара-саптара күлүм түгэҥҥэ уокка былдьаммыта.
Валентина Сергеевна 1985 сылтан биһиги улууспутугар культура эйгэтигэр үтүө суобастаахтык үлэлии-хамсыы, айа-тута сылдьар биир бастыҥ үлэһиппит буолар. Саха Республикатын культуратын туйгуна, Саха Республикатын “Гражданскай килбиэн”, СР норуот уус-уран айымньытын сайдыытыгар киллэрбит кылаатын иһин анал бэлиэлэр хаһаайкалара, Саха сирин Оһуохайын үтүөлээх этээччитэ, Суотту нэһилиэгин бочуоттаах олохтооҕо Валентина Сергеевна улуус, нэһилиэк культуратын сайдыытыгар киллэрбит кылаата улахан. Суотту нэһилиэгэр ыытыллар культурнай тэрээһиннэр кини кыттыыта, тэрийиитэ суох ааспаттар. Кини салайар “Тэбэнэттэр” көр-күлүү бөлөҕө улуус, республика таһымнаах конкурстар хас да төгүллээх кыайыылаахтара.
Улуус культуратын үлэһиттэрэ Валентина Сергеевна ыарахан түгэҥҥэ түбэспит кэмигэр туора турбакка, бары биир киһи курдук өйөбүл буолан, көмө харчы хомуйуутун саҕалаабыппыт. Ыам ыйын 30 күнүгэр Суотту нэһилиэгин сынньалаҥ киин үлэһиттэрин тэрийиилэринэн “Күн киһитэ көмүскэс, айыы киһитэ аһыныгас” акция концерт Суотту кулуубар буолла. Улуус культураҕа управлениетын көҕүлээһининэн бу акция концертка Өнөртөн Мария, Анна, Ион Лукачевскайдар, Василий Федоров, Тандаттан Катя Алексеева-Готовцева, Хомустаахтан Анна Бечеканова, “Тойон Мүрү” култуура дыбарыаһыттан Иннокентий Готовцев, Семен Орлов, Тумултан “Айыллан” норуот тыйаатыр артыыстара, сынньалаҥ киин специалистара, культура управлениетыттан Анна Федорова кыттыыны ыллыбыт.
Аһымал концертка нэһилиэк клубтарын, кииннэммит библиотека тиһигин, Бороҕоннооҕу оҕо искусство оскуолатын, улуус музейын, культура управлениетын үлэһиттэрин, культура үлэһиттэрин идэлээх сойууһун улуустааҕы, республикатааҕы комитеттарыттан, улуус культуратын ветераннарыттан, барыта 306.500 солкуобайдаах көмө харчыны Валентина Сергеевна дьиэ кэргэнигэр туттардыбыт.
Бу акция концертка кыттыыны ылбыт биир идэлээхтэрбитигэр махталбытын тиэрдэбит. Куруук даҕаны бу курдук бары биир сомоҕо буолан, үөрүүлээх да, кутурҕан да түгэннэргэ өрүү бииргэ буолуоҕуҥ. Дьоҥҥо-сэргэҕэ үөрүүнү эрэ бэлэхтиир түгэннэр элбээтиннэр, эһиги дьиэ кэргэҥҥитигэр барыта этэҥҥэ эрэ буоллун!!!

Анна Федорова,
Уус Алдан улууһун культураҕа управлениетын кылаабынай специалиһа.
31.05.2024 с.