Ытык Лөгөй нэһилиэгин дьоно-сэргэтэ Улуу Кыайыы 80 сылын көрсө “Уруйдуубут Улуу Кыайыыны” улуустааҕы бэстэбээлгэ өрө көтөҕүллэн, биир санаанан, соругунан сомоҕолоспуттара көстөр.
Ол курдук бэстэбээл кыайыыны уһансыбыт сэрии, тыыл бэтэрээннэрин сүгүрүйэн Кыайыы болуоссатыгар умуллубат үйэлээх уокка сүгүрүйүү тэрээһининэн саҕаланна. Манна нэһилиэк баһылыга Попов Николай Николаевич, үлэ, спорт ветерана Лөгөй нэһилиэгин бочуоттаах олохтооҕо Румянцев Василий Васильевич Аҕа дойдуну көмүскүү барбыт 144 буойуттарга, барыта фронт туһатыгар тыылга үлэлээбит дьонноругар-сэргэлэригэр сүгүрүйэн махтал тылларын эттилэр, сибэкки дьөрбөтүн уурдулар.
Лөгөй лицей-интернатыгар Кыайыы 80 сылыгар аналлаах быыстапка турбут. Кэлбит ыалдьыттары Лөгөй нэһилиэгин Далбар Хотуттара арыылаах алаадьынан, көөнньүрүллүбүт быырпаҕынан айхаллыы көрүстүлэр.
Быыстапка киирээти кытта “Сэрии “ диэн суостаах тыл ыалы барытын аймааһынын, ийэ уолун сэриигэ атаарар көстүүттэн саҕаланна.
2019 с “Арассыыйа ийэлэрэ” Бүтүн уопсастабыннай хамсааһын Саха сиринээҕи эрэгийиэннээҕи салаата Ийэ дойдуларын көмүскээри сэрии хонуутугар охтубут, тыыннаах эргиллэн кэлбит буойуннар ийэлэрин үйэтитэр сыаллаах-соруктаах “Ийэлэр өлбөт үйэлээх хорсун быһыылара” бырайыагы саҕалаабыта.
Лөгөйдөр 144 буойун ийэлэрин ааттарын сөргүтэн, 84 ийэ аатын булбуттар . Кинилэртэн 1 ийэ -5 оҕотун, 2 ийэ -4 , 5 ийэ-3, 26 ийэ-2, 47ийэ -1дии оҕотун сэриигэ атаарбыттар. Барыта 25 ыалтан 65 ини бии уолаттарын атаарбыттарыттан — 32 уол оҕо сэрии толоонуттан эргиллибэтэх.
Ини бии Мигалкиннар төрүччүлэрин сырдаттылар. Саллааттар ийэлэрэ оҕолорун сэриигэ атаарбыттара, тыылга тыыннарын харыстаабакка үлэлээбиттэрин хаартыскалаан презентацияны, сайтка киирбит матырыйааллары Аня Бурнашева кэпсээтэ.
«Уус Алдан өлбөт үйэлээх полката” сайт сүрүн соругунан биир дойдулаахтарбыт бойобуой суолларын үйэтитии, кэлэр көлүөнэ ыччаты патриотическай тыыҥҥа иитии.
Барыта уоттаах сэриигэ Лөгөй нэһилиэгиттэн 144 киһи ыҥырыллан барбыт, 73 буойун эргиллибэтэх. Ааттара чуолкайдааһын үлэтэ бара турар. Бу үлэни Янис Сысолятин быыстапка «Үйэлээх полк” диэн салаатыгар колонналарынан арааран кэпсээтэ. Колоннаҕа хас биирдии буойун туһунан хаартыскалаах матырыйааллар баннерга бэчээттэнэн тураллара ураты көстүү буолла. Буорах сыттаах суруктар кэпсээни ситэрэн биэрдилэр.
Сэдэх экспонатынан сэрии ветерана Прокопий Алексеевич Самсонов концлааҕырга илдьэ сылдьыбыт ньуоскатын туһунан кэпсээтэ саха тылын уонна литературатын учуутала Петухова Варвара Семеновна.
Салгыы аан дойду виртуоз-хомусчута Петр Петрович Оготоев аатынан Кэптэнитээҕи сынньалаҥ кииҥҥэ Лөгөй нэһилиэгин уус-уран самодеятельноһын көрүү кэнсиэрэ ыытылынна.
Кэнсиэр сэрии ветерана, концлааҕыр эрэйин-муҥун билбит, эйэлээх олоҕу уһансыбыт Прокопий Алексеевич Самсонов олоҕо дьүһүйүллэн 6 көстүүнэн туруоруллубут. Манна “Кырдьыктаах” биэриигэ ыалдьыттаата Прокопий Самсонов төрөппүт кыыһа Мария Прокопьевна Алексеева. Биэриини ыыттылар Лөгөй лицей-интернатын 7 кылааһын үөрэнээччилэрэ Ксюша Находкина, Янис Сысолятин.
“Эйэлээх олох” 1 көстүүгэ Прокопий Алексеевич Дүпсүн улууһун 1 Өспөх Чараҥай алааһыгар 1920 сыллаахха төрөөбүт. Манна эйэлээх олоҕу көрдөрөн “Лөгөй оһуордара” үҥкүү бөлөҕө Чороонноох үҥкүүнү, трио Варвара Федорова, Виталий Гоголев, Михаил Пухов “Мутукча сыта” ырыанан астылар.
“Мин мантан сэриигэ барбытым” 2 көстүүгэ Прокопий Алексеевич 1942 с. педагогическай училищеҕа үөрэнэ сылдьан бэбиэскэ тутан сэриигэ барар. Манна Валентина Бурнашева суруйуутугар “Сэрии кэминээҕи тэтэрээт” хоһоону Айгыына Бурнашева бэрт хомоҕойдук кыайа-тута аахта. Арсен Сокорутов “Мин мантан сэриигэ барбытым” ырыаны, “Лөгөй оһуордара” үҥкүү бөлөҕө “Синий платочек” үҥкүүнү толордулар.
“Саа-саадах тутуурдаах уоттаах сэрии” 3 көстүүгэ Прокопий Алексеевич билиэҥҥэ түбэспитин туһунан кэпсэнэр. Манна “Смуглянка” үҥкүүнү Ольга Перевалова, “Добун” квартет “Хайыһар”, Федора Попова, Илья Артамонов “Байыаннай үҥкүүнү” толордулар.
“Харах уулаах Кыайыы күнэ” 4 көстүүгэ Прокопий Алексеевич Кыайыы сураҕын истиитэ, концлааҕыртан куотуутун туһунан кэпсэнэр. Манна “Талба” вокальнай ансамбль “Туруйалар”, дуэт Анна Бечеканова, Саяна Федорова “Көрсүһүү”, “Дуорай” эр дьон ансамбыла “Кыайыы күнэ” ырыалары толордулар.
“Кыайыы ыһыаҕа” 5 көстүүгэ Прокопий Алексеевич төһөлөөх эрэйи-муҥу көрсөн дойдутун булбутун туһунан кэпсэнэр. Бу көстүүгэ Диана Петухова “Кыайыы ыһыаҕа” тойугунан аста, “Алгыс” хомусчуттар бөлөхтөрө “Хомус дорҕооно” дьүһүйүүнү, Диана Петухова “Алгыс ырыата”, Ульяна Бурнашева чабырҕах, Кыайыы оһуохайын Диана Петухова, Мотрена Кычкина толордулар.
6 көстүү түмүк чааһа, манна сэрии ветерана Прокопий Алексеевич Самсонов олоҕун туһунан оҕолоро таһааттарбыт “Эрэй-муҥ төлөбүрэ – дьоллоох олох” кинигэнэн биэрии тахсыбытынан кыыһа Мария Прокопьевна махтал тылларын анаата.
Дьүүллүүр сүбэ быһаарыытынан Лөгөй нэһилиэгин быыстапката 4,8 баал, кэнсиэрэ – 4,25 бааллары ыланнар, уопсай бааллара – 4,52 буолла.
Елизавета Данилова, Вера Портнягина.Олунньу 25 күнэ, 2025 сыл.
